[客戶訂車] 2010 英國版HONDA CIVIC SI 1.8

今次訂車分享主角為吳生，吳生基於工作原因經常需要周圍走，加上鐘情手波車，所以一直都以一部手波2010年本田Fit GE8作代步。除左工作之外，佢都需要經常接載屋企人，有感於Fit車身比較輕及不能滿足佢對空間需求，因此產生換車想法。

一開始佢目標已經非常清楚，HONDA+手波+車到屋企人。佢本人非常喜歡英國版Type R FN2外型，無奈係FN2只得3門版本，唔能夠滿足最重要要求。偶然之下發現FN2之下仲有一款同佢外形一樣嘅5門版思域，於是開始係網上搜集更多有關呢部車相關資料。佢自己確定左車型後並搜集哂所有資料後，發現到另一個問題: 呢部日本廠牌嘅車竟然係日本無出，即係話佢只能夠係原本生產呢部車嘅原產國 – 英國落手。

佢最初搵過香港某大型汽車協會查問過，得知道要由英國運一部車返黎，單單運輸費用就已經需要收取大約5-6萬蚊，呢個數目仍然未計到港之後嘅後續費用。高昂嘅費用令到佢只能尋求其他可行途徑，後來吳生經佢同事介紹得悉我地戴登汽車有做英國進口車業務，於是主動聯絡我地查詢有關資料。佢將自己在英國二手車網站嘅目標提供比我地後，我地即刻通過英國同事直接聯絡賣家並計算到港後出牌費用。係訂車過程中，我地將訂車流程、好處以及風險清楚解釋比吳生知道。係日本買車可以搵當地驗車機構鑑定，當然英國亦可以搵驗車機構驗車，而且英國買車仲可以做HPI report，將目標車輛做一次”起底”。

吳生係英國買車其實遇到一波三折，現時呢一部車並非佢揀選嘅第一部車。前幾次唔中嘅原因包括車輛狀況不佳，仲有就係比其他買家捷足先登。英國地方大，我地同事往往都要花數小時由辦公室揸車去到目標車輛所在地。記得吳生第一個目標我地同事來回走左5-600公里路程，但因為原車停放左一段時間，試車時發現明顯雜音，於是都直接通知吳生放棄選購，咁樣做無疑擔誤左買車時間，幸好經過我地分析後吳生亦明白隔山買牛不能急於一時。我地從來都強調我地嘅角色只係幫客人代購同運車返香港，買邊一部車最終都係由客人自己拍板。雖然如此，但我地亦都會盡最大努力去降低客人買錯車中伏嘅風險，只要係我地可以安排，我地英國嘅同事會親身到車輛所在地進行基本目測檢驗，確定運作正常後開始進行轉名及安排正式出口手續。

為左減輕吳生係運輸上支出，今次我地選用車船方式將部Civic Si運到香港。正常黎講，由英國到香港船程大概30日，有快有慢。當部車上船之後，其實所有工序就會同係日本訂車一樣。因為天氣問題，航班稍為延誤，幸得吳生理解同體諒。當車輛到港後，我地立即通知吳生，並安排到場初步檢驗車輛並進行試駕。

之後我地全速進行到港之後工作，當中包括檢測廢氣，安排報關，申請海關評稅工作，申請排期驗車。同時間我地都將車輛交比我地經驗豐富嘅光哥升高部車，進行一系列正常檢查及維修，確保可以符合本港運輸署驗車標準，順利出牌。當中每一個步驟程序我地都向吳生清楚交代，知道程序去到邊一個地步。經過兩個多月漫長等待，我地成功咁一次即pass通過車檢，而吳生亦都順利將部車通過我地由英國買返黎香港仲出埋牌。